Lajme

Uashington, 14 janar- Presidenti i SHBA-së Barak Obama kërkoi nga Kongresi 708 miliardë dollarë rekord për buxhetin e Ministrisë së Mbrojtjes për vitin fiskal 2011 dhe përveç kësaj 33 miliardë dollarë shtesë për luftërat në Afganistan dhe në Irak për vitin 2010, transmetuan agjencitë botërore.


Tridhjetë e tre miliardë shtesë për nevojat e luftës për sivjet kryesisht do ta financojnë prezencën më të madhe ushtarake të SHBA-së në Afganistan. Obama para ca kohësh dërgoi mbështetje prej 30.000 ushtarëve nga kontigjenti amerikan tani më i vendosur në këtë vend.
Buxheti i deritanishëm i Pentagonit për vitin fiskal 2010 është në vlerë prej 660 miliardë dollarë, në të cilat hyjnë shpenzimet për veprimet ushtarake në Irak dhe në Afganistan. Nëse Kongresi i miraton 33 miliardë dollarë shtesë për këtë vit, buxheti i Pentagonit për vitin 2010 do të rritet në 693 miliardë dollarë.
Viti fiskal 2011 fillon më 1 tetor të këtij viti. Pritet buxheti të publikohet nga Shtëpia e Bardhë më 1 shkurt.