Lajme

Qeveria në mënyrë të njëpasnjëshme tallet me arsimin shqip. Para disa muajve ishte vendimi i maqedonishtes që nga klasa e parë e tani kërkohet gjithashtu që evidenca në shkollat fillore të shkruhet në dy gjuhësi. Ndërkaq shkollat shqipe paralajmëruan se ky vendim nuk do të zbatohet. "Ky është vendim i kotë sepse nuk do të respektohet ashtu siç nuk respektohet edhe vendimi i mësimit të gjuhës maqedonase që nga klasa e parë", tha Myzafer Rexhepi, drejtor i shkollës fillore "Jane Sandanski" në Shkup.


Gjithashtu, edhe nga komuna e Çairit thanë që ky vendim do të bojkotohet pasi që nuk është në favor të shqiptarëve. "Nëse kjo evidencë vendoset që të shkruhet në dygjuhësi, atëherë nuk është në favor të shqiptarëve dhe nuk do të respektohet nga shkollat shqipe", tha Shefqet Zekolli, udhëheqës i sektorit për arsim në komunën e Çairit. Ndërkaq, nga Lidhja e Arsimtarëve Shqiptarë (LASH), thanë që evidenca deri më tani është shkruar vetëm në gjuhën amë dhe ashtu do të vazhdojë të shkruhet. "Ky ligj për shkuarjen e evidencës në dy gjuhësi është që dy vite dhe nuk është respektuar, nëse ndodh që të kalon ky vendim në parlament prapë nuk do të respektohet", tha Nuhi Dardhishta, kryetar i LASH-it. Ai gjithashtu shtoi se edhe pse nuk është respektuar ky ligj, inspektorët nuk kanë dënuar asnjë arsimtarë ngase të gjithë e dimë që këto vendime janë absurde.