Lajme

Prishtinë, 6 mars – Zyrtarë të misionit të NATO-s në Kosovë, KFOR kanë shfaqur zemërimin e tyre ngase dje në qendër të Prishtinës ka parakaluar garda e Forcës së Sigurisë së Kosovës (FSK) me armë. Koloneli i KFOR-it, Hans Pieter Buch, ka thënë se FSK-ja nuk ka pasur leje të shtetit të bartë armë në shënimin e përvjetorit të12-të të “Epopesë së UÇK-së”.

Koloneli gjerman nuk e ka përjashtuar mundësinë e ngrirjes së raporteve me FSK-në, për shkak të bartjes së armëve në këtë manifestim. Ndërkohë presidenti Fatmir Sejdiu deklaratat e zyrtarëve të KFOR-it e ka quajtur si një keqkuptim. “KFOR-i është investues i rëndësishëm i rritjes së FSK-së dhe ju e dini që FSK, të gjitha lëvizjet e gjertanishme i ka bërë në partneritet me ta dhe mendoj që në të ardhmen natyrisht do të jetë kontribuues për lëvizjet tona sa më të shpejta në anëtarësim në NATO. Mund të ketë ndonjë keqkuptim unë nuk dua të jap ndonjë koment pasi që edhe nuk kam burime”, ka thënë Sejdiu. FSK-ja është themeluar para një viti dhe është vazhdimësi e TMK-së. Ajo është ende duke u kompletuar dhe është nën mbikëqyrje të NATO-s.